الشعر الشعبي العراقي عدنه الغيره مهره وعاشكه الراس

عدنه الغيره مهره وعاشكه الراس
وماي اوجوهنه يغطي الفراتين

حكَه الماي لوسير للجروف
مثل واهس طفل من يحضن الطين

فقره احنه ومشينه الدرب حفاي
ندري نطيح وتغثنه الدرابين

تلكَينه النوايب باالهلاوين
وعاشرنه الصبر عشره محبين

فتحنه بيوتنه وضيفنه الجروح
وجاي تخدرت دمعات كل عين

لبسنه الطيبه ثوب بعسر الايام
ومن هدومنه تعرفنا طيبين

الفرح ماآجه بدربنا وماعرفناه
نشوفه شلون كَلي البآخر الصين

علينه سنين يوسف مرن اعجاف
فوكـَ اوجوهنه نرسمن نياشين

بعنه ارواحنه والموت شراي
وقبضنه من الثمن بس العرابين

ومن سرفن اردانه الموت للزاد
بلحمنه انترست حلوكَـ المواعين

بطل يازمن من عدنه شتريد
جبنه اعمارنه بحزنك مساجين

وكَفنه اباب بيرك كومة اجروح
ودلوك مابخل ينضح سجاجين

ولان ماضل عقل ضل فارغ الراس
تداينه العقل من المجانين

الفقر خلاني آيس شفته بالعين
رفع خشمه وتكبر عالمساكين

الناس اعلى الفرح توكف سره بهاي
وحنه اعلى الحزن نوكف سراوين

الدله الها الجمر والنار والحر
ويصفه البوس من حصت الفناجين

تره اسماعيل مد اركَبته للموت
خاف من الذبح تبجي القرابين

شماتحمه الشمس بيام تموز
ماتلغي الفياي البلحياطين